FƏALİYYƏT / Yerli layihələr

«Hər Kəs Bərabərdir - Hər Kəs Qeyri Fərqli Deyil: Gənclərin Hər Kəs Fərqli-Hər Kəs Bərabər adlı kampaniyanın əsas komponentlərinin yayılmasında rolu» mövzusunda 3 günlük Seminar

Azərbaycan Gəncləri – Avropa Birliyi Əməkdaşlığı İctimai Birliyi və Azərbaycan-Amerika Gəncləri İctimai Birliyi Avropa Şurası ilə birgə «Hər Kəs Fərqli-Hər Kəs Bərabər» adlı kampaniyanın çərçivəsində «Hər Kəs Bərabərdir - Hər Kəs Qeyri Fərqli Deyil: Gənclərin Hər Kəs Fərqli-Hər Kəs Bərabər adlı kampaniyanın əsas komponentlərinin yayılmasında rolu» mövzusunda 15-18, Aprel 2006-cı il tarixləri arasında «Gənclik İstirahət və Turizm Mərkəzində» 3 günlük Seminar təşkil etmişdir. Seminarda Gənclər və İdman Nazirliyinin gənclər təşkilatları ilə iş üzrə şöbəsinin müdiri cənab Fərhad Hacıyev, Avropa Şurasının Azərbaycandakı İnformasiya Mərkəzinin icraçı direktoru cənab İlqar İbrahimli və gənclər təşkilatlarının nümayəndələri iştirak etmişlər.

Seminarı giriş sözü ilə açan Azərbaycan-Amerika Gəncləri İctimai Birliyinin sədri və layihənin əlaqələndiricisi cənab Vüqar Əhmədov tədbirin əsas məqsədinin milli və etnik azlıqlara mənsubluğu olan gənclərin, gənc qadınlar, eləcə də cəmiyyətdən və ictimai həyatdan kənarda qalmış regiondan olan gənclərin vətəndaş cəmiyyəti təşəbbüslərinə və kampaniyanın işinə fəal qoşulmasına şərait yaratmaq və gənclərdə «Hər Kəs Fərqli-Hər Kəs Bərabər» adlı kampaniyaya qarşı maraq oyatmaqla onların təşəbbuslərini cəmiyyətdə gender bərabərliyi, tolerantlıq, müxtəliflik və qarşılıqlı hörmət kimi dəyərlərin bərqərar olmasına yönəltmək olduğunu qeyd etdi.

Seminarda çıxış edən Gənclər və İdman Nazirliyinin gənclər təşkilatları ilə iş üzrə şöbəsinin müdiri cənab Fərhad Hacıyev Seminarın keçirilməsinin əhəmiyyətindən danışaraq bu tədbirin «Hər Kəs Fərqli-Hər Kəs Bərabər» kampaniyasının Azərbaycan gəncləri arasında yayılmasında öz töhfəsini verəcəyini qeyd etdi.

Sonra Avropa Şurasının Azərbaycandakı İnformasiya Mərkəzinin icraçı direktoru cənab İlqar İbrahimli Avropa Şurası, onun strukturları və fəaliyyət istiqamətləri haqqında Seminar iştirakçılarına məlumat verdi.

İştirakçılara Avropa Şurası haqqında film nümayiş etdirildikdən sonra Seminar öz işinə davam etdi.