FƏALİYYƏT / Yerli layihələr

“Bələdiyyələr və gənclər arasında əlaqə və əməkdaşlığın inkişafı”

Dekabrın 8, 2004-cü ildə Azərbaycan-Amerika Gəncləri İctimai Birliyi “Bələdiyyələr və gənclər arasında əlaqə və əməkdaşlığın inkişafı” layihəsi çərçivəsində və Dünya Bankı, Açıq Cəmiyyət İnstitutu, USAİD, Avrasiya Fondunun maliyyə dəstəyi ilə Füzuli rayonunda “Bələdiyyə seçkilərində və bələdiyyə işində gənclərin rolu” mövzusu ətrafında dəyirmi masa keçirmişdir.

Dəyirmi masa layihənin fəaliyyətinin qiymətləndirilməsi və təqdimatına və nəşr olunmuş “Bələdiyyə seçkilərində və bələdiyyə işində iştirak” kitabçasına həsr olunmuşdur. Dəyirmi masada donor təşkilatlarının nümayəndələri olan: Cənab Kazım Quliyev – Avrasiya Fonudunun proqram koordinatoru, cənab Fuad Süleymanov-Açıq Cəmiyyət İnstitutunun proqram koordinatoru, xanım Səbinə Cəfərova – Dünya Bankının Azərbaycandakı nümayəndəsi, o cümlədən cənab Əkrəm Abdullayev – Gənclər, İdman və Turizm Nazirliyinin Uşaq və Gənclər Təşkilatları ilə iş üzrə departamentin sədri, cənab Fuad Muradov – Azərbaycan Respublikası Gənclər Təşkilatlarının Milli Şurasının sədri, cənab Rauf Zeyni – Demokratik Seçkilər Mərkəzinin sədri, cənab İlqar Məmmədov – Bakıdakı Amerika Səfirliyinin nümayəndəsi, cənab Tural Kərimli – Azərbaycan İnsan Hüquqları Fondunun prezidenti, və yerli və beynəlxalq QHT və KİV-lərin nümayəndələri iştirak edirdi.

Azərbaycan-Amerika Gəncləri İctimai Birliyinin sədri cənab Vüqar Əhmədov giriş sözündən sonra layihə çərçivəsində bu günə kimi yerinə yetirilmiş fəaliyyətlər və layihə haqqında məlumatı dəyirmi masa iştirakçılarının diqqətinə çatdırdı. Cənab Əhmədov gənclərin yerli özünüidarəetmə və bələdiyyə seçkilərində geniş iştirakına yönəlmiş layihənin məqsədləri və nəticələrini qeyd etdi. Dəyirmi masa iştirakçıları gənclərin bələdiyyə işində və növbəti bələdiyyə seçkilərində aktiv iştirakının zəruriliyini vurğulayaraq yerli özünü-idarə institutlarının əhəmiyyəti barədə müzakirə apardılar. Onlar qeyd etdilər ki, bu tip təhsil layihələrinin xüsusilə kənd yerlərində - Füzulidə keçirilməsi çox əhəmiyyətlidir və lazımi təşəbbüsdür.