FƏALİYYƏT / Yerli layihələr

Azərbaycan Gənclər Parlamentinin rəsmi təqdimatı

Sentyabrın 28, 2005-ci ildə Beynəlxalq Mətbuat Mərkəzində Azərbaycanda ilk dəfə təsis olunan Azərbaycan Gənclər Parlamentinin rəsmi təqdimat mərasimi keçirildi. Təqdimat mərasimində Norveç Krallığının Bakıdakı səfirliyinin birinci katibi xanım Qoril Yohansen, Avrasiya Fondunun direktoru cənab Camal Şahverdiyev, Açıq Cəmiyyət İnstitutu-Yardım Fondunun direktoru cənab Fərda Əsədov, YAP-in Gənclər Birliyinin sədri cənab Ramil Həsənov, Azərbaycan İnsan Hüquqları Fondunun prezidenti cənab Tural Kərimli, Azərbaycan Gənclər Parlamentinin üzvləri, Beynəlxalq Təşkilatların, QHT və KİV nümayəndələri iştirak etmişdi.

Rəsmi təqdimatda Azərbaycan Gənclər Parlamenti haqqında iştirakçılara ətraflı məlumat çatdırıldı və Azərbaycanın müxtəlif yerlərindən olan potensiallı gənclər parlament seçkilərində Azərbaycan parlamentinə alternativ təkliflərdən ibarət qanunvericilik materialları hazırlamağı və öz aktiv iştirakına təkan verərək yerli gənclər birliklərinin maraqlarını təbliğ etmək niyyətində olduqlarını qeyd etdilər.

Həmçinin təqdimat mərasimində layihənin koordinatoru cənab Vüqar Əhmədov Azərbaycan Gənclər Parlamentinin məqsədi haqqında məlumat verdi. O qeyd etdi ki, yeni yaranmış bu təşkilat Azərbaycan Parlamentində gənclərin marağını təbliğ etmək və Azərbaycanda demokratikləşmə prosesinə və azad seçkilərə yardım etmək yolu ilə Azərbaycan Parlamentinin deputatları, Beynəlxalq Təşkilatlar, Avropa Gənclər Parlamenti və Höküməti ilə birgə işləyəcək.

İlk fəaliyyətə münasib olaraq region üzrə koordinatorlar regionlardan gəncləri Azərbaycan Gənclər Parlamentinə cəlb etməklə məşqul olacaqlar və ictimaiyyətə çatdırmaq üçün nəzərdə tutulmuş gənclərin regional ehtiyacları və problemləri haqqında araşdırmalar aparacaqlar. Daha sonra araşdırmaların nəticələri Azərbaycan Gənclər Parlamentinin qanunvericilik təklifləri paketində toplanacaq və layihələr Azərbaycan Parlamentinə göndəriləcək.