FƏALİYYƏT / Yerli layihələr

Press Reliz

01 Noyabr, 2006-cı il tarixində «Hyatt Hotel» Konfrans və Görüş Mərkəzi, Bakı zalında Azərbaycan-Amerika Gəncləri İctimai Birliyinin təşkilatçılığı və Norveç Krallığının Azərbaycandakı Səfirliyi, ABŞ Beynəlxalq İnkişaf Agentliyi və Avrasiya Fondunun maliyyə dəstəyi ilə «Azərbaycan Gənclər Parlamenti-İkinci Hissə» adlı layihə çərçivəsində «Azərbaycanda qanunvericilik aktları və gəncliyin maraqları: Reallıqlar və Perspektiv Düşüncələr» mövzusunda konfrans baş tutmuşdur.

Konfransda Azərbaycan Respublikası Milli Məclisinin üzvləri cənab Fuad Muradov, Əkrəm Abdullayev, Azay Quliyev, Sabir Hacıyev, Rauf Əliyev, Eyvaz Qurbanov, İlham Məmmədov, xanım Gültəkin Hacıyeva, Konstitusiya Araşdırmaları Fondunun sədri cənab Əliməmməd Nuriyev, Azərbaycan Respublikası Gənclər və İdman Nazirliyi gənclər təşkilatları ilə iş üzrə bölməsinin müdiri cənab Vüqar Əhmədov, Avrasiya Fondunun proqram rəhbəri Səbinə Süleymanova, Açıq Cəmiyyət İnstitutu Yardım Fondunun direktoru cənab Fərda Əsədov, ABŞ Təhsilli Məzunlar Birliyinin sədri Fariz İsmayılzadə, AİESEC təşkilatının Azərbaycan nümayəndəliyinin rəhbəri Bəxtiyar Hacıyev, Azərbaycan Gənclər Parlamentinin regional koordinasiya Şuralarının üzvləri, gənc parlamentarilər, Beynəlxalq Təşkilatların və Qeyri -Hökümət Təşkilatlarının nümayəndələri iştirak etmişlər.

Konfransda ilkin olaraq layihə çərçivəsində hazırlanan Azərbaycan-Amerika Gəncləri İctimai Birliyinin www.aagib.org adlı veb səhfəsinin təqdimatı olmuş və Azərbaycanın 8 bölgəsi üzrə 665 gənc arasında keçirilən sorğunun nəticələri konfrans iştirakçılarının diqqətinə çatdırılmışdır.

Sonra konfransı giriş sözü ilə açan Azərbaycan-Amerika Gəncləri İctimai Birliyinin sədri cənab Vüqar Əhmədov konfransın məqsədləri haqqında geniş məlumat vermiş və təşəbbüsün potensiallı gənclər arasında gənc parlamentarilərin yetişməsinə şərait yaratmaq, gənclərin parlament institutuna və Milli Məclis deputatlarına çıxış imkanlarını artırmaq, onların maraqlarını müdafiə etmək və onların sosial-iqtisadi, təhsil, mədəni və regional problemlərini ictimai səviyyədə qaldırmağa yönəldiyini bildirmişdir.

Konfransda çıxış edən Azərbaycan Respublikası Milli Məclisinin üzvü cənab Fuad Muradov bu təşəbbüsün gənclərin parlament institutuna və Milli Məclis deputatlarına çıxış imkanlarını artırmaq və gənc parlamentarilərin yetişməsinə şərait yaratmaq istiqamətində atılan vacib addım olduğunu qeyd etmişdir.

Konfransın məruzəçiləri olan Konstitusiya Araşdırmaları Fondunun sədri cənab Əliməmməd Nuriyev, Azərbaycan Respublikası Gənclər və İdman Nazirliyi, Gənclər təşkilatları ilə iş üzrə bölməsinin müdiri cənab Vüqar Əhmədov Azərbaycanda mövcud qanunvericilik bazası və gənclərlə bağlı qəbul olunan qanunlar haqqında konfrans iştirakçılarına məlumat vermişlər.

Daha sonra çıxış edən Millət Vəkili cənab Azay Quliyev gənclərin prioritet problemlərinin müəyyənləşməsi istiqamətində bu layihənin həyata keçirilməsinin zəruriliyindən söhbət açmışdır.
Azərbaycan Respublikası Milli Məclisinin üzvü cənab Əkrəm Abdullayev çıxışında əsas diqqəti gənclərlə bağlı qəbul olunmuş qanunlar və bu sahədə mövcud olan boşluqlara yönəltmişdir.

Gənclərin problemləri və bu gün qeyri-hökumət təşkilatlarının diqqət yetirəcəyi gənclərlə bağlı sahələr haqqında fikirlərini bildirən Azərbaycan Respublikası Milli Məclisinin üzvü xanım Gültəkin Hacıyeva Azərbaycan-Amerika Gəncləri İctimai Birliyinin bu təşəbbüsünü yüksək qiymətləndirmişdir.

Ümumilikdə çıxış edən Millət Vəkilləri Azərbaycan-Amerika Gəncləri İctimai Birliyinin «Azərbaycan Gənclər Parlamenti-İkinci Hissə» adlı layihəsini dəstəkləmiş, məhz bu Gənclər Parlamentinin Azərbaycanda gənclərlə işləyən institut olduğunu vurğulamışlar.

Konfransın ikinci hissəsində tədbirdə iştirak edən gənc parlamentarilər, Beynəlxalq və gənclər təşkilatlarının nümayəndələri mövzu ilə bağlı çıxışlar etmişlər.

Azərbaycan Gənclər Parlamentinin regiondan olan üzvləri gənclərin regional problemlərini, ehtiyaclarını, onları düşündürən problemlərlə bağlı Millət Vəkillərinə suallarını və fikirlərini çatdırmışlar.

Tədbirin sonunda qərara alınmışdır ki, gənc parlamentarilərlə millət vəkillərini görüşdürən bu cür tədbirlər bundan sonra da davam etdirilsin və tədbirdə səslənən bütün fikir və təkliflər toplandıqdan sonra Azərbaycan-Amerika Gəncləri İctimai Birliyi Azərbaycan Respublikası Milli Məclisi ilə əməkdaşlıq çərçivəsində yeni təşəbbüslərlə çıxış etməyi planlaşdırır. Bu layihələr əsasən Milli Məclisdə gənclər dinləmələrinin keçirilməsi, gənclərlə bağlı, gənclərin prioritet problemlərini özündə əks etdirən və gənclərin maraqlarının müdafiəsinə yönəlmiş qanun layihələrinin hazırlanması və qanunverici orqana təqdim olunması, gənc parlamentarilərin hər il Milli Məclisdə millət vəkilləri ilə görüşlərinin keçirilməsi və digər təşəbbüslərdən ibarətdir.

Mətbuat Xidməti
(+994 50) 343 53 02
office@aagib.org
www.aagib.org