FƏALİYYƏT / Yerli layihələr

Azərbaycan-Amerika Gəncləri İctimai Birliyi Açıq-Cəmiyyət İnstitutu -Yardım Fondunun maliyyə dəstəyi ilə «Regionlara QİÇS əleyhinə avto-tur aksiyası» layihəsi çərçivəsində gənclərdən ibarət könüllü qrupun seçilməsi üzrə müsabiqə elan edir:

Bu gün gənclər Azərbaycan əhalisinin çox hissəsini təşkil edir. Amma təəssüf ki, onların bir çoxu, xüsusilə də region gəncləri QİÇS-dən və digər zərərli vərdişlərdən qorunmaqla bağlı biliklərdən məlumatsızdırlar. Bu hal bir tərəfdən ümumi və tibbi maarifləndirmə işinin zəifliyindən, məlumatsızlıqdan, informasiya qıtlığından, informasiya alma mənbələrinin məhdud olması, digər tərəfdən müəyyən sosial-iqtisadi çətinliklər, təhsildəki problemlər və sair səbəblərdən irəli gəlir.

Məhz QİÇS-lə mübarizə sahəsində sağlam və təhlükəsizlik davranışın təbliği məqsədi ilə Azərbaycan-Amerika Gəncləri İctimai Birliyi region gəncləri arasında adı çəkilən problemlə bağlı maarifləndirmə işinin davamlılığının vacibliyini nəzərə alaraq Sumqayıt, Əli-Bayramlı, Mingəçevir, və Zaqatala bölgəsində maarifləndirmə və kütləvi aksiyaların həyata keçirilməsi istiqamətində layihənin icrasını planlaşdırır.

Bu layihə Azərbaycanın qeyd olunan regionlarında gənclərlə bağlı iş sahəsində sadalanan problemləri nəzərə alaraq QİÇS-ə qarşı mübarizədə gənclərin və əhalinin maarifləndirilməsi və onların imkanlarının gücləndirilməsini nəzərdə tutur. Qabaqcıl təcrübədən istifadə edərək Azərbaycanın 4 (dörd) bölgəsinə «QİÇS-dən azad nəsil uğrunda» adlı mesajı adı altında avto-tur kampaniyasının keçirilməsi planlaşdırılır. Azərbaycan-Amerika Gəncləri İctimai Birliyinin bu layihəsində 10 nəfərlik gənclər qrupu tərəfindən biz regionlarda yuxarıda qeyd etdiyimiz problemlərin həllinə nail olmağa çalışacağıq.

Məhz bu məqsədlə təşkilat Azərbaycanın 4 (dörd) bölgəsinə «QİÇS-dən azad nəsil uğrunda» adlı mesajı adı altında avto-tur kampaniyasının keçirilməsi üçün 10 (on) nəfərlik gənclər qrupunun müəyyənləşdirilməsi üçün Azərbaycan gənclərinə ünvanlanan müsabiqə elan edir.

Müsabiqədə iştirak edən gənclər Sumqayıt-Əli-Bayramlı-Mingəçevir-Zaqatala marşrutu üzrə avto-turun iştirakçıları olaraq əsas vəzifələrinin aşağıdakı fəaliyyətlərin icraçıları olması nəzərdə tutulur:

 Rayon yerli hakimiyyət orqanları, yerli təhsil və səhiyyə işçilərinin, gənclər təşkilatları nümayəndələrinin, şagird, tələbələrin və rayon ictimaiyyətinin iştirakı ilə toplantıların keçirilməsi. Toplantı zamanı maarifləndirici xarakterli materiallar paylanacaq və gənclərin sağlam həyat tərzi prinsiplərinə riayət etməsi, QİÇS-ə yoluxma ilə bağlı riskli davranışlardan uzaq olması, müxtəlif zərərli vərdişlərin təsirinə düşmək istiqamətində risqli davranışlara yol verilməsinin qarşısını almaq üçün müzakirələrin və söhbətlərin aparılması nəzərdə tutulur.
 Hər bir regionun orta və ali məktəb, xəstəxana, paliklinika və doğum evlərinin kollektivləri ilə görüşlərin keçirilməsi və «QİÇS nədir?», «QİÇS haqda tibbi faktlar», «QİÇS-dən necə qorunmalı» mövzularında söhbətlərin aparılması nəzərdə tutulur.
 Seçilmiş gənclər qrupu vasitəsi ilə regionlarda olan mehmanxanalar, bar və restoranlar, bərbərxanalarda, məktəb və universitetlərdə, marketlərdə, nəqliyyat kassalarında, avtovağzal və dəmiryol vağzallarında, yanacaq doldurma məntəqələrində, park və meydanlarda donor tərəfindən təqdim olunacaq qoruyucu vasitələr, materiallar və çap məhsulları paylanacaq və plakatlar yapışdırılacaq.
 Yerli gənclər-idman dövlət idarələrinin köməyi ilə hər bir regionun mərkəzi parkında rayon gəncləri ilə kütləvi görüşün keçirilməsi və «QİÇS-ə yox, sağlam həyata hə deyək» adlı şüarların səsləndirilməsi planlaşdırılır.
 Hər bir regionda icra hakimiyyətlərinin köməyi ilə üzərində QİÇS əleyhinə devizlər həkk olunmuş köynəklər və papaqlar geyinmiş gənclərdən ibarət qrup və rayon gənclərinin iştirakı ilə geniş əhali kütləsinin diqqətini bu problemə cəlb etmək məqsədi ilə aksiya xarakterli icazəli yürüşün keçirilməsi planlaşdırılır. Qeyd edək ki, yürüş zamanı gənclərdən ibarət könüllülər qrupu QİÇS əleyhinə plakatlar nümayiş etdirəcək və «QİÇS-ə yox, sağlam həyata hə deyək» adlı şüarlar səsləndirəcək.

Bu layihənin iştirakçısı olaraq 10 nəfərlik gənclər qrupunda təmsil olunmaq və yuxarıdakı fəaliyyətlərin icraçısı qismində iştirak etmək istəyən könüllü gənclərdən 25 Noyabr, 2006-cı il tarixinədək öz tərcümeyi hallarını (CV) aaysa_office@yahoo.com elektron ünvanına göndərmələri xahiş olunur.

Layihənin gənclər qrupunda təmsil olunmaq istəyən şəxslər aşağıdakı şərtlərə cavab verməlidir:

 16-30 yaş arasında olmalı
 QİÇS və digər zərərli vərdişlər haqqında ümumi təsəvvürə və məlumata malik olmalı
 Azərbaycanın bölgələrində həyata keçirilən maarifləndirici layihələrdə iştirak təcrübəsi olmalı
 İnsanlarla ünsiyyət qurma və orijinal təqdimat etmə bacarığına malik olmalı
 Gənclər işində təcrübəsi olmalı
 Ağır və gərgin iş şəraitinə uyğunlaşmağa hazır olmalı
 Azərbaycanın 4 (dörd) bölgəsinə həyata keçiriləcək avto-tur aksiyasında layihə müddətində tam şəkildə iştirak etməyə hazır olmalı

Qeyd edək ki, layihəyə cəlb ediləcək gənclərə qonorarın ödənilməsi nəzərdə tutulub.

QİÇS əleyhinə mesajların və rəmzlərin əks olunduğu lövhələrlə bəzədilmiş avtobusla bölgələrə səfərlərə başlamazdan əvvəl gənclər qrupu xüsusi təlim kursu keçəcək.

Qeyd edək ki, BMM-də mətbuat və ictimaiyyət nümayəndələri üçün 1 Dekabr QİÇS əleyhinə mübarizə günü ilə bağlı mətbuat konfransının keçirilməsi və ondan sonra avto-tura start verilməsi nəzərdə tutulur.

Azərbaycan-Amerika Gəncləri İctimai Birliyi
Mətbuat Xidməti
aaysa_office@yahoo.com
www.aagib.org
office@aagib.org
(+994 50) 343 53 02